За свой дэбютны раман («Былы сын», 2014) Саша Філіпенка год таму атрымаў «Рускую прэмію». З першай спробы — дыплом першай ступені ў намінацыі «Вялікая проза». Ну і як пасля гэтага сядаць за наступную кнігу? Тым больш што героя «Былога сына», што ўсіх падкупляла, аўтар відавочна «будуе з сябе», сваёй біяграфіі, сваіх юнацкіх уражанняў і пачуццяў.

Ці хопіць яму ўласнага жыцця на наступнага героя, ці не здарыцца самапаўтор? Паўтору не здарылася. Затое зноў нарадзіўся яркі, парадаксальны, незвычайны і востра сучасны персанаж — прафесійны тэлевізійны гумарыст, які прыдумляе жарты для тэлевядучых.

Справа гэта няпростая. Асабліва калі сёння днём цябе звольнілі, з жонкай ты толькі што развёўся, а раніцай ад цябе збег кот...